مردان : امیر جماعت اسلامی سراج الحق نے کہا ہے کہ برما میں مسلمانوں کے قتل عام پرحکمرانوں کی خاموشی مجرمانہ ہے اور اس وقت مسلم دنیا پر قبرستان جیسی خاموشی طاری ہے.
وہ خیبر پختونخوا کے شہر مردان میں ایک اجتماع سے خطاب کر رہے تھے انہوں نے جمعہ کو برما کے سفارت خانے کے سامنے احتجاج کا اعلان کرتے ہوئے مطالبہ کیا کہ مسلم ممالک فوری طور پر برما کے سفیروں کو ملک بدرکردیں.
سراج الحق نے کہا کہ مسلم ممالک حق وباطل کی جنگ میں غیرجانبداری ختم کریں اور برما کے خلاف سخت سے سخت سے ایکشن لیتے ہوئے سفارتی تعلقات منقطع کردیں اور روہنگیا مسلمانوں کی آباد کاری کے لیے اپنا کردار ادا کریں.
انہوں نے کہا کہ برما میں مسلمانوں کی نہ تو عزت محفوظ ہے اور نہ ہی جان و مال کی کوئی ضمانت ہے وہاں مسلمانوں کی بستیاں کی بستیاں جلا دی گئی ہے جس میں جل کئی مسلمان خاکستر ہوگئے.
امیرِ جماعت اسلامی نے کہا کہ غیرت مند مسلمان اپنے روہنگیا بھائیوں کی مدد کے لیے اُٹھ کھڑے ہوں اور بعد نماز جمعہ اپنا احتجاج ریکارڈ کرائیں تاکہ عالمی برادری تک ہماری آواز پہنچ سکے.
