جدہ : سعودی حکومت نے ویزوں کے اجراء اور نافذ العمل ہونے کے حوالے سے نئے قوانین وضع کیے ہیں جس کے تحت خلاف ورزی کرنے والوں کو سخت سزاؤں اور بھاری جرمانے کا سامنا کرنا ہوگا۔
تفصیلات کے مطابق سعودی حکومت نے ویزا پالیسی سے متعلق نئے قوانین کا اعلان کیا ہے جن کے تحت خلاف ورزی کے مرتکب افراد اور اداروں کو سخت سزاوں اور بھاری جرمانے کا سامنا رہے گا جب کہ عمرہ کمپنیوں کو بلیک لسٹ بھی کیا جا سکے گا۔
سعودی وزارتِ داخلہ کے اعلامیے میں بتایا گیا ہے کہ عمرہ زائرین، حج اور وزٹ ویزا پر سعودی عرب آنے والوں کو مقررہ مدت کے اندر ہی واپس جانا ہوگا اور ایسا نہ کرنے پر پہلی بار عمرہ زائرین کو سزا 25 ہزار ریال، دوسری بار 50 ہزار ریال اور تیسری بار 1 لاکھ ریال تک جرمانہ ادا کرنا ہوگا۔
عمرہ کمپنیوں پر بھارے جرمانے ہوں گے
اعلامیے میں مزید کہا گیا ہے کہ نئے قوانین کی خلاف ورزی کرنے والی عمرہ کمپنیوں پر بھاری جرمانے عائد کیے جائیں گی جب کہ قوانین کی مسلسل خلاف ورزی کرنے والی کمپنیوں کو بلیک لسٹ کردیا جائے گا۔
دوسری جانب قوانین کی خلاف ورزی کرنے والے افراد کو ملازمتیں فراہم کرنے والے مقامی افراد پر بھی سخت جرمانے اور دیگر سزائیں بھی رکھی گئی ہیں۔
