کراچی: وزیراعظم شاہد خاقان عباسی نے پورٹ قاسم پر ایل این جی ٹرمینل کا افتتاح کردیا۔
تفصیلات کے مطابق وزیراعظم پاکستان شاہد خاقان عباسی آج صبح پورٹ قاسم پہنچے جہاں انہیں ایل این جی ٹرمینل کے بارے میں بریفنگ دی گئی۔
وزیراعظم شاہد خاقان عباسی نے پورٹ قاسم پر ایل این جی ٹرمینل کی افتتاحی تقریب سے خطاب کرتے ہوئے کہا کہ ماضی میں ایل این جی پاکستان لانے کی کوششیں ناکام رہیں۔
انہوں نے کہا کہ ٹرمینل 330 دن کی ریکارڈ مدت میں تعمیر کیا گیا جبکہ دو پارٹیوں نے ایل این جی لانے کےلیے بولی جمع کرائی تھی۔
وزیراعظم پاکستان کا کہنا تھا کہ ایل این جی کےٹھیکےمیں شفافیت کو مدنظر رکھا گیا اس حوالےسےچیئرمین پورٹ قاسم کا شکریہ ادا کرتا ہوں۔
وزیراعظم کا کہنا تھا کہ امید کرتا ہوں مزید ٹرمینل بھی کم مدت میں تیار ہوں گے۔اس موقع پر ان کا کہنا تھا کہ گیس ٹربائن کے3 بڑے پلانٹ لگا رہے ہیں جبکہ صنعتوں کو گیس کی بلاتعطل فراہمی جارہی ہے۔
وزیراعظم شاہد خاقان عباسی کا کہنا تھا کہ ایل این جی ٹرمینل پاکستان کا گیس سپلائی کا بڑاذریعہ ہے۔
وزیراعظم شاہد خاقان عباسی کی دو روزہ دورے پر کراچی آمد
خیال رہے کہ گزشتہ روز وزیرِاعظم شاہد خاقان عباسی دو روزہ دورے پر کراچی پہنچے تھے جہاں اُن کا استقبال سینئر صوبائی وزیر نثار کھوڑو نے کیا تھا۔
کراچی آمد کے بعد وزیراعظم شاہد خاقان عباسی سے قائم مقام گورنر سندھ سے ملاقات کی تھی اور شہر میں امن و امان سمیت تعمیر و ترقی کے حوالے سے اہم پروجیکٹس پر تبادلہ خیال کیا تھا۔
واضح رہے کہ وزیراعظم، تاجروں اور سرمایہ کاروں سمیت مسلم لیگ (ن) سندھ کے رہنماؤں سے بھی ملاقات کریں گے جس میں کراچی پیکیج سے متعلق بات چیت کی جائے گی۔
