پشاور: پاک فوج نے شمالی وزیرستان میں دہشت گردوں کی واپسی ناکام بنادی۔ پاک افغان سرحدی علاقے ووچا بی بی میں پاک فضائیہ کی بمباری سے متعدد دہشت گرد مارے گئے۔
پاک فوج کے شعبہ تعلقات عامہ آئی ایس پی آر کے مطابق پاک فضائیہ نے شمالی وزیرستان کے سرحدی علاقے ووچا بی بی میں کارروائی کی جس میں متعدد دہشت گرد ہلاک ہوگئے۔
کارروائی میں دہشت گردوں کے کئی ٹھکانے بھی تباہ ہوگئے۔
آئی ایس پی آر کا کہنا ہے کہ دہشت گرد شمالی وزیرستان کے سرحدی علاقے میں دوبارہ منظم ہونے کی کوشش کر رہے تھے جسے پاک فوج نے ناکام بنا دیا۔
یاد رہے کہ پاکستان میں گزشتہ چند روز میں ہونے والے متعدد دہشت گردی کے واقعات کے بعد پاک فوج نے دہشت گردوں کے خلاف بھرپور کارروائیاں کی ہیں۔ 17 فروری کو پاک فوج نے پاک افغان سرحد پر مہمند ایجنسی اور خیبر ایجنسی میں قائم جماعت الاحرار کے ٹھکانوں پر بمباری کی۔
کارروائی میں جماعت الاحرار کے ڈپٹی کمانڈر عادل باچا کا کیمپ اور تربیتی مرکز سمیت 6 سے زائد ٹھکانوں کو تباہ کردیا گیا۔
اس کے ایک روز بعد پاک افغان سرحد کے پار کارروائی کرتے ہوئے جماعت الااحرار کے مزید کیمپ تباہ کر دیے گئے جس کے دوران خودکش حملہ آور کو تربیت فراہم کرنے والا اہم کمانڈر رحمٰن بابا سمیت 20 دہشت گرد ہلاک ہوگئے۔
مذکورہ حملے میں پاک فوج نے دو روز تک آرٹلری شیلنگ کی جس سے 12 تربیتی کیمپ تباہ ہوئے۔
دوسری جانب خیبر ایجنسی میں پاک افغان سرحد طور خم گیٹ کو سیکیورٹی وجوہات کی بنا پر غیر معینہ مدت کے لیے بند کیا جاچکا ہے اور یہ تاحال بند ہے۔ پاک افغان سرحد پر سیکیورٹی بھی انتہائی سخت کردی گئی ہے۔
دہشت گردوں کی نقل وحرکت روکنے کے لیے سخت انتظامات کرتے ہوئے اضافی ہیوی آرٹلری پاک افغان بارڈر پر آگے بھجوا دی گئی ہے۔
