لندن : برطانوی تھنک ٹینک کا کہنا ہے کہ شمالی کوریااورامریکا کی جنگ کاامکان بہت زیادہ ہے، برطانیہ کو ممکنہ تیسری عالمی جنگ کیلئے تیار رہنا چاہئے،شمالی کوریاسےجنگ میں لاکھوں افراد مارے جائیں گے۔
غیر ملکی خبر رساں ایجنسی کے مطابق امریکا،شمالی کوریا پر تھنک ٹینک رائل یونائیٹڈ سروسز انسٹیٹیوٹ نے رپورٹ جاری کی ہے، رپورٹ میں کہا گیا ہے کہ شمالی کوریا اور امریکا کی جنگ کا امکان بہت زیادہ ہے، شمالی کوریا جنگ میں ایٹمی ہتھیار استعمال کرسکتا ہے۔
برطانوی تھنک ٹینک کے مطابق شمالی کوریا میزائل پروگرام تیزی سے بڑھارہاہے، ٹرمپ کے شمالی کوریاکے خلاف ایکشن کا خطرہ بڑھ گیا، جنگ کی صورت میں عالمی معیشت بری طرح متاثرہوگی۔
تھنک ٹینک کا رپورٹ میں کہنا ہے کہ برطانیہ کو ممکنہ تیسری عالمی جنگ کیلئے تیار رہنا چاہئے، برطانیہ کے پاس فیصلے کیلئے صرف چند گھنٹے ہوں گے، شمالی کوریاسےجنگ میں لاکھوں افراد مارے جائیں گے۔
مزید پڑھیں: امریکا کوایسی تکلیف دیں گے جواس نے پہلے کبھی نہیں سہی ہوگی، شمالی کوریا
رپورٹ کے مطابق چین میں شمالی کورین تاجروں کو کاروبار120 دن میں بند کرنے کاحکم دیا ہے ، چین تجارتی لحاظ سے شمالی کوریا کا سب سے بڑا شراکت دارہے۔
واضح رہے کہ اقوام متحدہ، امریکا، یورپ ، چین اور دیگر ممالک کی جانب سے وارننگ کے باوجود شمالی کوریا گزشتہ کئی ماہ سے اپنے میزائلوں کے تجربات کر رہا ہے، حال ہی میں شمالی کوریا نے ہائیڈروجن بم کا کامیاب تجربہ کیا تھا، جس کے بعد امریکہ اور شمالی کوریا کے درمیان کشیدگی میں مزید اضافہ ہوا ہے اور دونوں ممالک کی جانب سے دھمکیوں کا سلسلہ بھی جاری ہے۔
ہائیڈروجن بم کے تجربے کے بعد شمالی کوریا کو اقوام متحدہ کو سخت پابندیوں کا سامنا ہے۔
