بیجنگ: چین کے شمالی صوبے ہیپی کے گاؤں ژینگ جیاکو میں اچانک 60 فٹ لمبا پُراسرار ڈھانچہ برآمد ہوا جسے دیکھ کر مکین خوفزدہ ہوگئے۔
امریکی ویب سائٹ کے مطابق ژینگ جیاکو کے مکین اس بات کا دعویٰ کررہے ہیں کہ یہ عجیب الخلقت ڈھانچہ آسمان سے زمین پر آکر گرا جس کے بعد گاؤں کے لوگ پہلے خوف زدہ ہوئے اور پھر انہوں نے تصاویر بنانی شروع کیں۔
گاؤں والوں کا ماننا ہے کہ یہ ڈھانچہ ڈریگن کا ہے جو ایک افسانوی جانور ہے کیونکہ اس کا جسم بہت لمبا ہوتا ہے جبکہ یہ منہ سے آگ نکالنے کی صلاحیت رکھتا ہے۔
ڈھانچے کی تصاویر اور ویڈیوز سوشل میڈیا پر شیئر کی گئیں تو صارفین دیکھ کر حیران رہ گئے کیونکہ اس ڈھانچے کا سر پر ڈریگن کی طرح دو سینگ موجود ہیں۔
بعض صارفین نے دعویٰ کیا کہ یہ ڈھانچہ فلم کی شوٹنگ کے لیے رکھا گیا تھا تاہم اس ضمن میں ابھی تک کوئی تصدیق یا تردید سامنے نہیں آسکی اور نہ ہی مقامی انتظامیہ کی جانب سے ڈھانچے سے متعلق کوئی بیان جاری کیا گیا۔