نیویارک: مشہور و معروف کمپنی ایپل کے بہترین اور مہنگے فون آئی فون ایکس میں بڑی خرابی کا انکشاف ہوگیا۔
تفصیلات کے مطابق ایک ہزار امریکی ڈالر جدید فیچرز کے حامل آئی فون ایکس کی ایکٹیویشن کے مسئلے کے بعد اب ٹچ اسکرین کے نقص کا انکشاف ہوا ہے۔
ایپل مصنوعات پر نظر رکھنے والی ویب سائٹ نائن ٹو فائیو میک نے اپنی ایک رپورٹ میں بتایا ہے کہ ٹھنڈے موسم میں آئی فون ایکس کی ٹچ اسکرین کام کرنا چھوڑ دیتی ہے۔
ایسے مقام پر جہاں درجہ حرارت صفر ہوتا ہے وہاں آئی فون ایکس کی ٹچ اسکرین کام کرنا مکمل طور پر بند کردیتی ہے اور یہ ڈیوائس ایک طرح سے غیر فعال ہی ہوجاتی ہے۔
اس حوالے سے آئی فون ایکس استعمال کرنے والے صارفین نے سوشل میڈیا پر شکایت کی کہ انہیں انتہائی سرد موسم میں اپنے موبائل فون کو استعمال کرنے میں دشواری کا کرنا پڑ رہا ہے۔
یہ پڑھیں: آئی فون کا نیا ماڈل خریدنے کے لیے لمبی قطاریں
ایپل کمپنی نے اس خرابی کا اعتراف کرتے ہوئے کہا کہ وہ موسمی درجہ حرارت میں پیش آنے والی اس خرابی پر کام کررہے ہیں، مسئلے کے حل کے لیے سافٹ ویئر میں تبدیلی لائی جائے گی اور آئندہ کچھ دنوں میں اپ ڈیٹ کردیا جائے گا۔
واضح رہے کہ اس سے قبل آئی فون ایکس استعمال کرنے والے صارفین نے سخت سردی میں ڈیوائس کے ایکٹو نہ ہونے کی شکایت کی تھی، جس پر کمپنی کا کہنا تھا کہ یہ مسئلہ عارضی خلل کے باعث ہوا جو حل ہوجائے گا۔
