محرم الحرام کا مہینہ آتے ہی نذر و نیاز کا سلسلہ بڑھ جاتا ہے اور اس موقع پر حلیم سب سے زیادہ تیار کیا جاتا ہے، چونکہ حلیم کی تیاری میں زیادہ وقت لگتا ہے تو نوجوان اپنے دوستوں اور احباب کے ساتھ مل کر رات میں حلیم تیار کرتے ہیں۔
غذائی اجزا سے بھرپور حلیم دراصل ایشیا اور مشرق وسطیٰ کی صدیوں پرانی مقبول ڈش ہے، اسے عربی میں ہریس یا ہریسہ اور دیگر زبانوں میں کھچڑا اور دلیم بھی کہا جاتا ہے۔
آج ہم آپ کو لذیذ اور چٹ پٹی حلیم انتہائی آسان طریقے سے گھر پر تیار کرنے کی ترکیب بتائیں گے۔
اجزا
گائے کا گوشت بون لیس: 1 کلو
گیہوں: 250 گرام
جو: 125 گرام
گندم: 125 گرام
چنے کی دال: 1 کپ
مونگ کی دال: 1 چوتھائی کپ
مسور کی دال: 1 چوتھائی کپ
ماش کی دال: 1 چوتھائی کپ
گھی: 2 کھانے کے چمچ
ادرک لہسن کا پیسٹ: 2 کھانے کے چمچ
پیاز تلی ہوئی: آدھا کپ
نمک: 2 کھانے کے چمچ
لال مرچ پسی ہوئی: 3 کھانے کے چمچ
ہلدی: 1 ایک کھانے کا چمچ
دھنیہ پسا ہوا: 1 ایک کھانے کا چمچ
دہی: 1 کپ
تیل: 2 کھانے کے چمچ
گرم مصالحہ پسا ہوا: کھانے کا چمچ
سرو کرنے کے لیے
پیاز تلی ہوئی: حسب ضرورت
ہرا دھنیہ: حسب ضرورت
ہری مرچ: حسب ضرورت
ادرک: حسب ضرورت
لیموں کے سلائس: حسب ضرورت
ترکیب
ترکیبسب سے پہلے گیہوں اور جو کو رات بھر کے لیے کسی کھلے برتن میں پانی میں بھگو کر رکھیں اور صبح ابال لیں، پھر اسے بلینڈ کرلیں۔
اب چنے کی دال، مونگ کی دال، مسور کی دال اور ارہر کی دال کو چار سے پانچ گلاس پانی کے ساتھ پکائیں، یہاں تک کہ دالیں گل جائیں۔ انہیں بھی ٹھنڈا کر کے بلینڈ کر لیں۔
دیگچی میں ایک کپ تیل گرم کر کے اس میں پیاز ڈال کر کچا پکا کرلیں پھر اس میں ادرک لہسن کا پیسٹ ڈال کر دو منٹ پکائیں اور گوشت ڈال کر بھونیں۔
اب نمک، پسی لال مرچ، ہلدی، پسا دھنیہ اور دہی ڈال کر اچھی طرح مکس کرکے آٹھ سے دس گلاس پانی ڈالیں اور ڈھک کر پکائیں، یہاں تک کہ گوشت گل جائے۔
جب گوشت گل جائے تو ہاون دستہ میں گوشت اچھی طرح کچل لیں اور اس میں بلینڈ کی ہوئی دالوں کو ڈال کر مکس کریں اور ہلکی آنچ پر پکنے کے لیے رکھ دیں۔
چمچ چلاتے رہیں تاکہ گوشت اور دالیں ایک ساتھ اچھی طرح مکس ہو، جب حلیم گاڑھی ہوجائے تو چولہا بند کردیں۔
آخر میں اس میں پسا گرم مصالحہ شامل کر کے چمچ چلائیں، مزیدار حلیم تیار ہے۔
اسے تلی پیاز، ہرا دھنیہ، پودینہ، ہری مرچ، ادرک، لیموں کے سلائس اور دو کھانے کے چمچ گھی کے ساتھ سرو کریں۔
