ممبئی: ریلوے لائن عبور کرنے کی کوشش کرنے والی لڑکی تیز رفتار ٹرین کے نیچے آنے کے باوجود معجزانہ طور پر بچ گئی۔
بھارتی نیوز ایجنسی کے مطابق انیس سالہ پرتیکشا ناٹیگر کانوں میں ائیرفون لائن ریلوے لائن عبور کرنے کی کوشش کررہی تھی کہ اچانک اُسے سامنے سے آنے والی تیز رفتار ٹرین دکھائی دی۔
تیزرفتار ٹرین کو دیکھ کر لڑکی کے اعصاب نے ساتھ دینا چھوڑ دیا اور وہ پلیٹ فارم پر چڑھ نہ سکی، اس دوران اُس نے بھاگ کر واپس جانے کی کوشش کی تو ریل کا انجن قریب آگیا اور اُسے زور دار ٹکر لگی۔
انجن کی ٹکر لگنے سے لڑکی پٹریوں پر منہ کے بل گری اور ٹرین اُس پر چڑھ گئی، اس دوران پلیٹ فارم پر کھڑے لوگ سمجھنے لگے کہ شاید لڑکی اب بچ نہیں سکے گی مگر جیسے ہی گاڑی رُکی تو وہ اٹھ کھڑی ہوئی اور وہاں موجود لوگ حیرانی سے اُسے دیکھنے لگے۔
جسے اللہ رکھے اُسے کون چکھے کی مثال اس لڑکی پر صادر آتی ہے کہ جب وہ کھڑی ہوئی تو اُس کے سر اور چہرے پر معمولی چوٹیں تھیں جنہیں دیکھ کر لوگ حیران رہ گئے تاہم اسٹیشن انتظامیہ نے مذکورہ لڑکی کو فوری طور پر قریبی اسپتال منتقل کیا جہاں ڈاکٹرز نے اُس کی طبیعت کو تسلی بخش قرار دیا اور اسپتال سے فارغ کردیا۔
#WATCH Dramatic visuals: Girl survives after being run over by a train in Mumbai pic.twitter.com/C5ZYf84CL9
— ANI (@ANI_news) June 7, 2017
اس ضمن میں بھارتی نیوز چینل نے حادثے کی سی سی ٹی وی فوٹیج جاری کی ہے جس میں دیکھا جاسکتا ہے کہ سامنے سے آنے والی ٹرین کی رفتار کتنی تھی اور لڑکی کو کس قدر چوٹ لگنے کا خدشہ تھا۔