پیرس: فرانسیسی وزارت داخلہ کا کہناہےکہ ملک میں چار افراد کی گرفتاری کےبعد دہشتگرد حملے کا منصوبہ ناکام بنادیاگیا۔
تفصیلات کےمطابق فرانس کے جنوبی موں پیلیئر میں پولیس کی جانب سے ایک مکان میں کارروائی کی گئی،اس دوران 4افراد کوگرفتار کیاگیاجن میں ایک 16سالہ لڑکی بھی شامل ہے۔
پولیس حکام کا کہناہےکہ نومبر 2015 میں پیرس میں ہوئے حملے میں استعمال ہونے والے بم سے ملتاجلتا سامان اس کارروائی کےدوران پولیس نے اپنی تحویل میں لے لیا۔
مقامی میڈیا کی رپورٹس کےمطابق گرفتار کی گئی لڑکی سوشل میڈیا پر کہہ چکی ہیں کہ وہ شام وعراق جانا چاہتی ہیں یا پھر فرانس میں حملہ کرنا چاہتی ہیں۔
مزید پڑھیں:پیرس حملوں کے ماسٹر مائنڈ اور مزید2خودکش حملہ آوروں کو شناخت کرلیا گیا
مقامی میڈیا کے مطابق اس لڑکی نے ایک ویڈئو بھی بنائی تھی جس میں اس نےدہشت گرد تنظیم دولتِ اسلامیہ سے بیعت کا اعلان کیا تھا۔
یاد رہےکہ گذشتہ ہفتے پیرس میں معروف عجائب گھر لوو کے باہر سکیورٹی اہلکاروں پر چاقو سے حملہ کرنے والے شخص کو فرانسیسی سپاہی نے گولی مار دی تھی۔
واضح رہےکہ 2015 کے آغاز سے فرانس میں دہشت گرد حملوں میں کم از کم 230 افراد ہلاک ہو چکے ہیں،جبکہ درجنوں افراد ان حملوں میں زخمی ہوئے ہیں۔
