ممبئی: فیس بک نے بھارتی صارفین کے لیے ایسا فیچر متعارف کروایا ہے جو بہت پسند کیا جارہا ہے، اس فیچر کو استعمال کرنے سے آپ کی پروفائل پر لگی تصویر کوئی استعمال نہیں کرسکے گا۔
تفصیلات کے مطابق فیس بک پر موجود اکثر خواتین کا شکوہ تھا کہ اُن کی پروفائل پر لگی تصاویر کو غلط استعمال کیا جاتا ہے، کوئی بھی صارف اسے محفوظ یا شیئر کر کے کچھ بھی تحریر کر دیتا ہے۔
اسی شکایت کو مدنظر رکھتے ہوئے فیس بک نے ابتدائی طور پر بھارت میں ’’فوٹو گارڈ‘‘ نامی فیچر متعارف کروایا ہے، اس فیچر میں کئی طرح کے حفاظتی اقدامات ہیں، اس فیچر کی خاصیت یہ ہے کہ استعمال کرنے والے صارف کی کوئی بھی شخص تصویر ڈاؤن لوڈ ، شیئر یا پھر اسکرین شارٹ نہیں لے سکے گا، بالکل اسی طرح صارف کی تصویر کسی بھی دوسرے ساتھی کو ٹیگ نہیں کی جاسکے گی۔
اس فیچر کے ایکٹیویٹ ہونے پر صارف کی پروفائل پکچر کے گرد نیلے گرد کی حفاظتی بارڈر دکھائی دے گی اور تصویر کے گرد حفاظتی ڈھال نظر آئے گی، ایسا ہونے کی صورت میں آپ کی پروفائل پکچر محفوظ رہے گی۔
فیس بک انتظامیہ کا کہنا ہے کہ اس فیچر کا مقصد بالخصوص اُن تمام خواتین کو تحفظ دینا ہے جو فیس بک استعمال کرتی ہیں مگر کچھ وجوہات کی بناء پر تصویر لگانے سے قاصر رہتی ہیں، یہ فیچر ابتدائی طور پر بھارت میں شروع کیا گیا ہے تاہم کامیاب تجربے کے بعد اسے دنیا کے دیگر ممالک میں بھی متعارف کروایا جائے گا۔