کنٹاکی: امریکی ریاست میں مسلسل چوتھی بار ایک ہی کتے کو قصبے کا میئر منتخب کرلیا گیا۔
امریکی ویب سائٹ کے مطابق ریاست کنٹاکی کے نواحی قصبے میں میئر کے عہدے کے لیے مختلف جانوروں کو نامزد کیا گیا، جن میں بلی، گدھا، مرغی، کتا اور کئی دوسرے جانور بطور امیدوار تھے۔
انتخابات کے روز عوام کی بڑی تعداد نے برینھ پالٹرو نامی کتے کو سب سے زیادہ ووٹ کاسٹ کیے جس کے بعد اُسے مسلسل چوتھی بار قصبے کا میئر منتخب کردیا گیا۔
علاقہ مکینوں کا کہنا ہے کہ انتخابات میں جانوروں کو نامزد کرنے کا مقصد رضاکارانہ سرگرمیوں کے لیے فنڈز جمع کرنا ہے، انتخابات میں ووٹ کاسٹ کرنے والے شرکاء نے حق رائے دہی استعمال کرنے کے ساتھ ساتھ خطیر رقم بھی عطیہ کی۔
کتے کی مالکن نے جیت کے بعد خوشی کا اظہار کرتے ہوئے کہا کہ ’’مجھے اس بات کی بہت خوشی ہے کہ لوگوں نے میرے پالٹرو پر بھروسہ کیا اور اُس نے مسلسل چوتھی بار کامیابی حاصل کی‘‘۔