لاہور: بیوی سے چھپ کر دوسری شادی کرنے والے شخص کو عدالت نے 6 ماہ قید اور دو لاکھ روپے جرمانہ ادا کرنے کی سزا سنادی۔
تفصیلات کے مطابق لاہور کی مقامی عدالت میں عائشہ خلیل نامی خاتون نے درخواست دائر کی کہ اُن کے شوہر شہزاد ثاقب نے کسی دوسری خاتون سے بغیر اجازت شادی کرلی ہے۔
خاتون نے مؤقف اختیار کیا کہ اُن کے خاوند نے چھپ کر دوسری عورت کے ساتھ شادی کی جو ملکی قوانین کی خلاف ورزی ہے کیونکہ قانونی طور پر پہلی بیوی کی اجازت حاصل کرنا لازم ہے۔
عائشہ خلیل نے عدالت سے استدعا کی کہ دوسری شادی کے حوالے سے سپریم کورٹ کے فیصلے موجود ہیں لہذا عدالت اُن فیصلوں کی روشنی میں خاوند کے خلاف سخت کارروائی عمل میں لائے۔
سماعت کے دوران شوہر نے جوڈیشل مجسٹریٹ کو بتایا کہ دوسری شادی کے لیے شرعی طور پر بیوی سے اجازت کی ضرورت نہیں کیونکہ ہر مرد کو اسلام نے چار شادیاں کرنے کا اختیار دے رکھا ہے۔
عدالت نے خاوند شہزاد ثاقب کا مؤقف سننے کے بعد مقدمے کا فیصلہ خاتون کے حق میں سنایا اور شوہر پر 2 لاکھ روپے جرمانہ عائد کرتے ہوئے اُسے 6 ماہ کی قید پر جیل بھیج دیا۔
