شنگھائی : بیویوں کو شاپنگ پر لے جانا اکثر جھگڑے کا باعث بن جاتا ہے تاہم چین کے ایک شاپنگ مال نے اس مسئلے کا انوکھا حل نکالا ہے، اب دیر تک شاپنگ کرنے والی خواتین کو شوہر پریشان کریں تو اسے بھی جمع کرادیں۔
چین کے شہر شنگھائی کے شاپنگ مال میں دیر تک خریداری کرنے والی خواتین کیلئے ایک ایسی جگہ متعارف کرائی گئی ہے، جہاں وہ دوران شاپنگ پریشان کرنے والے شوہروں کو جمع کرواسکتی ہیں۔
شاپنگ مال میں شیشے کے ڈبے نصب کئے گئے ہیں، یہ ڈبے ان مردوں کیلئے بنائے گئے ہیں، جو اپنی بیگم کو شاپنگ کیلئے لانا چاہتے ہیں لیکن د کان دکان پھرنے کے عمل کو پسند نہیں کرتے۔
بیوی کی شاپنگ سے تنگ شوہر حضرات کو ان ڈبوں میں مانیٹر، کپمیوٹر اور گیمز پیڈ کی سہولت فراہم کی گئی ہے، جہاں وہ نوے کی دھائی کے گیمز کھیل سکتے ہیں۔
شوہروں کا کہنا ہے کہ خواری سے جان چھوٹی، اسکول لائف کے گیمز کھیلے، اتنا مزا آیا کہ واپس جانے کا دل نہ چاہا۔
یانگ نامی شخض کا کہنا تھا کہ یہ ڈبے بہت اعلیٰ ہیں، میں نے ٹیکن 3 کھیلی اور مجھے لگا میں پھر سے سکول کے زمانے میں لوٹ گیا ہوں۔
شاپنگ مال کی جانب سے یہ سہولت مفت ہے تاہم آنے والے دنوں میں اس کے لیے فیس بھی مقرر کر دی جائے گی۔
خیال رہے اس سے قبل چین ہی کے ایک شاپنگ مال میں ایسے شوہروں کے لیے ایک نرسری بنائی گئی تھی، جو اپنی بیگمات کی شاپنگ سے تنگ آجاتے ہیں، اس نرسری میں بیٹھ کر شوہر حضرات نہ صرف آرام کرسکتے ہیں بلکہ ٹی وی سے بھی دل بہلا سکتے ہیں۔
