لندن: برطانوی کمپنی نے ٹریفک جام کی مشکلات کو دیکھتے ہوئے ایسی گاڑی تیار کی ہے جو رش میں کھڑی گاڑیوں کے اوپر سے گزر کر آپ کو جلدی منزل تک پہنچا سکتی ہے۔
دنیا کی بڑھتی ہوئی آبادی کے باعث ٹریفک جام کی صورتحال کو دیکھتے ہوئے دنیا بھر کے ماہرین عوام کو ٹریفک جام سے نجات دلانے کے لیے مختلف خیالات پیش کرنے کے ساتھ ساتھ کئی ایجادات بھی کررہے ہیں۔
برطانوی کمپنی کی جانب سے ’’ہم سب‘‘ کے نام سے ایک گاڑی تیار کی ہے جو ٹریفک جام کے مسئلے سے نجات دلانے کے لیے کارآمد ثابت ہوسکتی ہے، گاڑی میں ہائیڈرولک سسٹم نصب کیا گیا ہے۔
جدید سہولیات سے آراستہ ہم سب گاڑی میں ایسا سسٹم نصب کیا گیا ہے کہ ٹریفک جام میں گاڑی پھنسنے پر اگر ڈرائیور وہ بٹن دبائے گا تو گاڑی اوپر کی جانب اٹھ جائے گی اور ڈرائیور اسٹیرنگ سے کنٹرول کرتے ہوئے گاڑی کو ٹریفک جام سے نکال لے گا۔
گاڑی میں ایک بٹن نصب کیا گیا ہے جس کو دباتے ہی اندر لگے پائپ باہر نکل آئیں گے اور گاڑی اوپر کی طرف اٹھ جائے کی جس کے بعد ایک بڑا خلا پیدا ہوگا اور یہی گاڑی کو رش سے نکالنے میں مدد گار ثابت ہوگا۔
انتظامیہ کی جانب سے یہ گاڑی صرف آزمائشی طور پر بنائی ہے تاہم کامیاب تجربے کے بعد اس کے مزید ماڈل بنا کر فروخت کے لیے پیش کیے جائیں گے۔