تازہ ترین

حکومت کا ججز کے خط پر انکوائری کمیشن بنانے کا اعلان

اسلام آباد: وفاقی حکومت نے اسلام آباد ہائی کورٹ...

فوجی عدالتوں سے 15 سے 20 ملزمان کے رہا ہونے کا امکان

اسلام آباد : اٹارنی جنرل نے فوجی عدالتوں سے...

پیشہ ورانہ زندگی میں اپنائے جانے والے آداب

روزمرہ کی عام زندگی، اور پیشہ ورانہ اور کاروباری محافل میں شریک ہونا دو مختلف مرحلے ہیں۔ کاروباری تقریبات میں اپنائے جانے والے اصول کسی شخص کے نہ صرف پروفیشنل اور مہذب ہونے کی نشاندہی کرتے ہیں بلکہ اس کا اچھا تاثر قائم کرتے ہیں۔

اگر آپ ان اصولوں کو نظر انداز کریں گے یا ناواقف ہوں گے تو یقیناً آپ دیگر افراد پر اپنا نہایت غلط تاثر چھوڑیں گے جو آپ کے مستقبل اور کاروبار کے لیے نقصان دہ ثابت ہوسکتا ہے۔

تو کیوں نہ ایسے آداب سے واقفیت حاصل کی جائے تاکہ آپ کاروباری تقریبات اور ہائی پروفائل محفلوں میں شرمندگی و خفت سے بچ سکیں۔

تعارف کے وقت کھڑے ہوجائیں

جب آپ کا تعارف کروایا جائے تو اس وقت کھڑے ہوجائیں۔ کاروباری آداب کی ایک ماہر باربرا پیچر کہتی ہیں، ’جب آپ بیٹھے ہوں گے تو لوگوں کے لیے آپ کو نظر انداز کرنا آسان ہوجائے گا۔ کھڑا ہونا آپ کی شخصیت کو نمایاں کرے گا‘۔

اپنا مکمل نام بتائیں

4

کسی کاروباری محفل میں اپنا پورا نام بتائیں۔ البتہ اس بات کا خیال رکھیں کہ دیگر لوگ اپنا نام کیسے بتا رہے ہیں۔ اگر وہ اپنا نام مختصر کر کے بتاتے ہیں تو آپ بھی یہی اصول اپنائیں۔

مصافحے کے لیے ہاتھ بڑھائیں

3

اگر کسی تقریب میں آپ میزبان ہیں، یا آپ ایسے افراد سے مل رہے ہیں جو آپ سے کم تر عہدوں پر فائز ہیں تو مصافحہ کے لیے پہلا ہاتھ آپ کو بڑھانا ہے۔ بعض اوقات اکثر افراد مصافحہ کرتے ہوئے تذبذب کا شکار ہوتے ہیں۔ ایسی صورت میں آپ بغیر کسی رد و کد کے اپنا ہاتھ آگے بڑھائیں اور پرجوش مصافحہ کریں۔

اس بارے میں باربرا پیچر کہتی ہیں، ’امریکا میں مصافحہ کرنا ایک سنجیدہ نوعیت کا کاروباری اصول ہے‘۔

لباس کا خیال رکھیں

1

پیشہ ورانہ میٹنگ یا تقریب میں جاتے ہوئے لباس کا خیال رکھیں۔ بعض اوقات کاروباری محافل کے لیے ایک مخصوص ڈریس کوڈ ہوتا ہے جو عموماً دعوت نامے پر لکھا ہوتا ہے۔ اس ڈریس کوڈ کی سختی سے پابندی کریں۔

اگر ڈریس کوڈ نہیں بتایا گیا کہ تو آپ کو علم ہونا چاہیئے کہ کس موقع کے لیے کیسا لباس زیب تن کرنا ہے۔ سنجیدہ نوعیت کی کاوباری محفلوں میں ہمیشہ ایسا لباس پہنیں جس سے آپ کا سنجیدہ اور پروفیشنل تاثر جھلکے۔

صرف ایک بار شکریہ

19

کاروباری گفتگو کے دوران ’شکریہ‘ کا استعمال صرف ایک یا دو بار کریں۔ اس سے زیادہ بار شکریہ کا استعمال کرنا آپ کو ضرورت مند ظاہر کرے گا۔

شکریہ کا علیحدہ نوٹ

5

تقریب کے بعد 24 گھنٹوں کے اندر تقریب میں شریک افراد کو شکریہ کا علیحدہ پیغام بھیجیں۔ اگر یہ پیغام بذریعہ ای میل ہو تو زیادہ بہتر ہے۔ اس پیغام کا مقصد ان افراد کا، بشمول میزبان شکریہ ادا کرنا ہوگا جن کی وجہ سے آپ نے ایک بہترین شام گزاری۔

موبائل فون کو دور رکھیں

6

خالصتاً کاروباری نوعیت کی تقریبات میں موبائل فون کو بند رکھیں یا کم از کم کسی سے گفتگو کے دوران یا کسی سے ملتے ہوئے ہرگز فون کا استعمال نہ کریں۔

علاوہ ازیں اگر آپ میز کے گرد بیٹھ کر محو گفتگو ہیں تو موبائل کو میز پر مت رکھیں۔ اس سے یہ تاثر جائے گا کہ آپ کسی کال یا میسج کے لیے سامنے بیٹھے شخص کو نظر انداز کر سکتے ہیں۔

سوشل میڈیا کا پیشہ ورانہ استعمال

18

پروفیشنل نوعیت کے سوشل میڈیا پلیٹ فارمز جیسے لنکڈ ان وغیرہ پر اپنی پروفائل پکچر ایسی لگائیں جس میں آپ سنجیدہ دکھائی دیں۔ یہ تصویر آپ کے چہرے کی ہونی چاہیئے۔

کاروباری رابطوں کے لیے استعمال کی جانے والی سائٹس پر ذاتی سرگرمیوں کی تصاویر لگانے سے پرہیز کریں جیسے خاندان کے ساتھ ڈنر یا ساحل سمندر پر سیر کرتی ہوئی تصویر۔

سنجیدہ ای میل ایڈریس

17

اپنی ای میل آئی ڈی بناتے ہوئے پرنس، پرنسز، ڈول، بے بی، اپنی تاریخ پیدائش، یا اپنے پیدائشی برج کا نام لکھنے سے گریز کریں۔ آپ کا ای میل ایڈریس آپ کے اپنے نام پر یا جس ادارے میں کام کرتے ہیں اس سے متعلق ہونا چاہیئے۔

غیر سنجیدہ القابات سے پرہیز

16

پیشہ ورانہ ای میل یا ٹیکسٹ بھیجتے ہوئے بے تکلف اور غیر سنجیدہ القابات جیسے ہے، یو، وغیرہ سے گریز کریں۔ اس کی جگہ صرف ہائی یا ہیلو کا استعمال کریں۔

نام بھول جانے کا اعتراف کریں

15

باربرا پیچر کے مطابق اگر آپ اپنے پیشہ ورانہ حلقہ احباب میں کسی کا نام بھول گئے ہیں تو اس کا اعتراف کرنے میں کوئی حرج نہیں۔ یہ بہتر ہے بہ نسبت اس کے، کہ آپ اسے غلط نام سے مخاطب کریں۔

دفتر پہنچ کر سب سے ملیں

7

اپنے دفتر پہنچ کر راستے میں آنے والے ہر شخص کو مسکرا کر ہیلو کہیں یا سلام کریں۔ ہو سکتا ہے آپ جس شخص سے لفٹ یا راہداری میں ملے ہوں وہ کسی ضروری میٹنگ میں آپ کے ساتھ براجمان ہو۔

اگر آپ پہلے سے اس سے اچھے طریقے سے ملے ہوں گے تو آپ اس پر ایک اچھا تاثر قائم کر چکے ہوں گے۔ اور ہاں، جب کوئی آپ کو سلام کرے یا ہیلو کہے تو جواباً آپ بھی اسے ہیلو کہیں۔ یہ ایک لازمی اصول ہے۔

گفتگو کے دوران ہاتھوں کا استعمال

8

میٹنگ میں گفتگو کرتے ہوئے کبھی بھی شہادت کی انگلی کا استعمال نہ کریں۔ یہ ایک تحکمانہ اظہار خیال ہوگا۔ اس کی جگہ گفتگو کے دوران انگلیوں کو ملا کر ہوا میں لہرائیں۔

تاخیر سے مت پہنچیں

کسی بھی میٹنگ یا کاروباری تقریب میں دیر سے پہنچنا آپ کی غیر سنجیدہ طبیعت کو ظاہر کرے گا۔ اس سے پرہیز کریں۔ اگر کبھی آپ دیر سے پہنچیں تو اپنی تاخیر کی معقول لیکن مختصر وجہ بتا کر معذرت کریں اور اپنی نشست پر بیٹھ جائیں۔

کسی کے لیے کرسی مت کھینچیں

9

یہ ایک عام رواج ہے کہ جب کسی ڈنر پر جایا جائے تو مرد حضرات، خواتین یا بزرگ افراد کے لیے کرسی کھینچ کر انہیں پہلے بیٹھنے کی پیشکش کریں۔ لیکن کسی میٹنگ میں یہ حرکت کرنے سے پرہیز کریں۔

میٹنگ میں جاتے ہوئے کسی کے لیے دروازہ کھولنے میں تو کوئی حرج نہیں لیکن کرسی سب اپنے لیے خود درست کریں تو زیادہ بہتر ہے۔

مہنگی چیز مت آرڈر کریں

10

کسی کاروباری تقریب میں کوئی مہنگی چیز آرڈر کرنے کا مطلب اپنے میزبان کی سخاوت سے ناجائز فائدہ اٹھانا ہے۔ کوشش کریں کہ وہی چیز آرڈر کریں جو سب کر رہے ہیں۔

کھانے کا بل

12

اگر آپ نے کسی کو میٹنگ یا گفت و شنید کے لیے مدعو کیا ہے تو یاد رکھیں آپ میزبان ہیں اور اس دوران کھائی جانے والی چیزوں کا بل ادا کرنا آپ کی ذمہ داری ہے۔ ایسے موقع پر میٹنگ ختم ہونے کے بعد آخر میں علیحدہ سے بل ادا کرنا بہتر ہے۔

رخصت کے وقت

11

تقریب سے رخصت ہوتے ہوئے رسمی جملوں سے میزبان یا مہمان سے رخصت چاہیں۔ آپ سے مل کر خوشی ہوئی، آپ سے مل کر اچھا لگا ایسے موقع کے لیے بہترین جملے ہیں۔

اگر آپ کو جلدی رخصت ہونا ہے تو معذرت کرتے ہوئے اپنی مصروفیت کا معقول جواز دیں، جیسے کسی دوسری میٹنگ میں شرکت کے لیے جانا ہے، یا فیملی کے ساتھ کوئی سرگرمی ہے۔ یہ انداز آپ کا بہترین تاثر تعمیر کرنے میں مدد دے گا۔


اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

Comments

- Advertisement -