راولپنڈی : آرمی چیف جنرل قمر باجوہ نے کہا ہے کہ سی پیک کے خلاف سازشوں سے مکمل طور پرآگاہ ہیں اس لیے سی پیک کے تحفظ کے لیے ہر ممکن اقدام اٹھائے ہیں۔
آئی ایس پی آر کے ترجمان میجر جنرل آصف غفور کے مطابق آرمی چیف قمر باجوہ نے اسپیشل سیکیورٹی ڈویژن کے ہیڈکوارٹرز کا دورہ کرتے ہوئے اپنے خیالات کا اظہار کیا۔
آئی ایس پی آر کے مطابق آرمی چیف کو اسپیشل سیکیورٹی ڈویژن ہیڈکوارٹرز کا دورے پر ڈویژن کے مربوط سیکیورٹی میکنزم پر بریفنگ دی گئی یہ ڈویژن خاص طور پر سی پیک میں شامل چینی شہریوں کی سیکیورٹی کے لیے قائم کیاگیا ہے۔
آرمی چیف جنرل قمر باجوہ نے کہا کہ چینی باشندوں کے تعاون اور اہمیت سے آگاہ ہیں اورسی پیک کی سیکیورٹی کے حوالے سے کیے گیا وعدہ نبھائیں گے جس کے لیے تمام تر تیاریاں مکمل ہیں۔
جنرل قمر باجوہ کی اسپیشل سیکیورٹی ڈویژن کے ہیڈ کوارٹرز آمد پر جی او سی ایس ایس ڈی میجرجنرل عابد رفیق نے آرمی چیف کااستقبال کیا اور بریفنگ دی جس پر آرمی چیف نے ڈویژن کے امور کار اور تیاریوں پر اطمینان کا اظہار کیا۔
