پورٹ آف اسپین : پاکستانی کرکٹر احمد شہزاد ویسٹ انڈین بلے باز سے ٹکرا کر شدید زخمی ہوگئے اور انہیں اسپتال منتقل کرنے کے لیے ایمبولینس کو گراؤنڈ میں ہی بلایا گیا۔
تفصیلات کے مطابق پورٹ آف اسپین میں جاری دوسرے ٹی ٹوئنٹی میچ میں ویسٹ انڈین بلے باز کو رنز آؤٹ کرنے کی کوشش میں پاکستانی کرکٹر احمد شہزاد مخالف ٹیم کے کھلاڑی والٹن سے جا ٹکرائے اور زخمی ہوکرزمین پر گر گئے۔
Ahmed Shehzad injured after a collision with Chadwick Walton #WIvPAK pic.twitter.com/f19KEZKcuy
— Pyar Ali Amir Ali (@pyarali7) March 30, 2017
ویسٹ انڈین بلے باز اور احمد شہزاد کے درمیان ٹکراؤ اتنا شدید تھا کہ احمد شہزاد زمین پر گرنے کے بعد اٹھنے کی کوشش میں ناکام رہے اور بے ہوش ہو گئے جس کے بعد فوری طور پر گراؤنڈ میں ایمبولینس کو بلایا گیا جس کے ذریعے انہیں اسپتال منتقل کیا جا رہا ہے۔
اس حادثے کے بعد کھیل کو روک دیا گیا ہے اور پاکستانی ٹیم کے کوچ اور آفیشلز گراؤنڈ میں ہی موجود ہیں جنہوں نے اپنی موجودگی میں احمد شہزاد کو ایمبولینس کے ذریعے اسپتال منتقل کروایا۔
واضح رہے آج ویسٹ انڈیز میں دوسرا ٹی ٹوئنٹی میچ کھیلا جا رہا ہے جس میں پاکستان نے ویسٹ انڈیز کو 133 رنز کا ہدف دیا ہے۔