کوئٹہ:سیکریٹری ہائرایجوکیشن عبداللہ جان کو علی الصبح اغوا کرلیا گیا‘ وزیراعلیٰ بلوچستان نواب ثنا اللہ زہری نے واقعے کا نوٹس لیتے ہوئے آئی جی بلوچستان سے فوری رپورٹ طلب کرلی ہے۔
تفصیلات کے مطابق آج بدھ کے روز سیکرٹری برائے ہائر ایجوکیشن عبداللہ جان کو گھر سے دفتر جاتے ہوئے نامعلوم افراد نے اغوا کرلیا ہے‘ تاحال مغوی کا کوئی سراغ نہیں ملا۔
پولیس کے مطابق اغوا کا یہ واقعہ بروری روڈ پر پیش آیا جب عبداللہ جان اپنے گھر سے دفتر جارہے تھے ان کی گاڑی وہیں بروری روڈ پر پائی گئی ہے۔
وزیراعلیٰ نواب زہری کا نوٹس
وزیر اعلیٰ بلوچستان نواب ثنا اللہ زہری نے اس ہائی پروفائل اغوا کے واقعہ پر تشویش کا اظہار کرتے ہوئے آئی جی بلوچستان سے واقعے کی تفصیلی رپورٹ طلب کرتے ہوئے مغوی سیکرٹری کو جلد از جلد بازیاب کرانے کی ہدایت کردی ہے۔
پولیس کے سامنے 3 افراد پر فائرنگ ، ملزمان باآ سانی فرار
واضح رہے کہ تین روز قبل منان چوک پر تین افراد کو سرعام چھریاں ماردی گئیں، ملزمان ہوائی فائرنگ کرتے اور باپ بیٹے کو چھریاں مارتے رہے، پولیس قریب کھڑی تماشاد یکھتی رہی۔
