لندن: برطانوی دارالحکومت لندن میں تیزاب گردی کا ایک اور واقعہ پیش آگیا۔ مشرقی لندن کے علاقے میں نامعلوم افراد 2 ایشیائی نوجوانوں پر تیزاب پھینک کر فرار ہوگئے۔
مشرقی لندن کے علاقے بیتھنل گرین میں نامعلوم افراد نے 2 ایشیائی نوجوانوں پر تیزاب پھینک کر انہیں زخمی کردیا۔ حملہ آوروں نے نسل پرستانہ نعرے بھی لگائے۔
تیزاب سے جھلسے نوجوانوں نے قریبی دکاندار سے پانی اور مدد طلب کی۔ پولیس نے موقع پر پہنچ کر تیزاب کا اثر کم کرنے کے لیے نوجوانوں پر پانی ڈالا۔
#ResponseTeamC @Ldn_Ambulance and @LondonFire dealing with a suspected acid attack in E2. pic.twitter.com/ogXbnHIEHL
— Tower Hamlets MPS (@MPSTowerHam) July 25, 2017
پولیس کے مطابق حملہ آوروں کی تلاش جاری ہے۔
یاد رہے کہ لندن میں گزشتہ چند ماہ کے دوران ایشیائی افراد پر تیزاب حملوں میں نمایاں اضافہ ہوا ہے۔ جون میں ماڈل ریشم خان اور ان کے کزن پر تیزاب پھینکا گیا جس سے ان کا چہرہ بری طرح جھلس گیا تھا۔
جولائی میں مشرقی لندن میں 7 افراد کو تیزاب سے نشانہ بنایا گیا۔
اس سے قبل بھی لندن کے ایک کلب میں تیزاب گردی کے واقعہ میں 20 افراد زخمی ہوئے تھے۔
