نیویارک: امریکہ میں دنیا کے 50 بہترین ریستورانوں کا مقابلہ منعقد ہوا جس میں اٹلی کا ریستوران بازی لے گیا۔
امریکہ میں دنیا کے بہترین ریستوران کے مقابلے کی تقریب منعقد ہوئی جس میں اٹلی کے اوشتریا فرانچسکانا ریستوران کے روایتی کھانے اور ماحول کو بہترین قرار دیا گیا۔ اس ریستوران نے روایتی کھانوں میں نئی جدت بھی پیدا کی۔
یہ ریستوران گزشتہ برس دوسرے نمبر پر رہا تھا۔
دنیا کے بہترین ریستوران کی فہرست ٹریڈ پبلیکیشن ریسٹورنٹ میگزین کی جانب سے 2002 سے مرتب کی جارہی ہے۔ یہ فہرست 972 خانساموں، فوڈ رائٹرز اور غذائی ماہرین کی رائے کی بنیاد پر تیار کی جاتی ہے۔
اس سال فہرست میں شامل دنیا کے 50 بہترین ریستورانوں میں سے نصف یورپی ریستوران ہیں، 6 امریکی ہیں، 6 جنوبی امریکی ہیں جبکہ 5 ایشیا کے ریستوران ہیں۔
مذکورہ تقریب میں دنیا کے بہترین خانساموں کو بھی انعامات سے نوازا گیا۔ فرانسیسی شیف پیری ہرمی کو دنیا کے بہترین پیسٹری شیف کے اعزاز سے نوازا گیا۔
