نیویارک: مائیکرو سافٹ نے اقوام متحدہ کی جانب سے سائبر دہشت گردی پر مباحثہ کی دعوت قبول کرلی ہے۔
تفصیلات کے مطابق مباحثے کو مصر کی جانب سے منعقد کیا جارہا ہے۔ مصر اس ماہ کی 15 رکنی کونسل کی سربراہی کر رہا ہے۔
یہ مباحثہ شدت پسندی اور دہشت گردی کے انٹرنیٹ اور سوشل میڈیا کے ذریعے بڑھتے ہوئے رجحان پر کیا جارہا ہے۔ یہ تاریخ میں پہلی مرتبہ ہے کہ کوئی ٹیکنالوجی کمپنی سیکیورٹی کونسل کے اراکین کی رہنمائی کرنے جارہی ہے۔
مائیکرو سافٹ کے ترجمان نے دعوت قبول کرنے کی تصدیق کی تاہم مزید معلومات دینے سے انکار کردیا۔
اس سے قبل اقوام متحدہ کے ایک پینل نے داعش اور دیگر شدت پسند تںظیموں کے سوشل میڈیا استعمال کرنے کے معاملے پر ان کمپنیوں کو اپنا کردار ادا کرنے کا کہا تھا۔
پینل نے تشویش کا اظہار کرتے ہوئے کہا تھا کہ شدت پسند تنظیمیں انٹرنیٹ کے ذریعے اپنے مقاصد کی تکمیل کررہی ہیں، دیگر لوگوں کو اپنی جانب راغب کر رہی ہیں، اور خوف کی فضا پھیلا رہی ہیں۔
یاد رہے کہ شدت پسند تنظیم داعش نے انٹرنیٹ کی بدولت دنیا بھر سے 30 ہزار نوجوانوں کو اپنی جانب راغب کیا اور یہ نوجوان داعش کے ساتھ کام کرنے کے لیے شام روانہ ہوگئے۔
