طور خم سرحد پر افغان بارڈر کی جانب سے ایک بار پھر فائرنگ کی گئی جس کے نیتجے میں پاک فوج کے پانچ اہلکار زخمی ہوگئے جنہیں سی ایم ایچ اسپتال منتقل کردیا گیا۔
سیکیورٹی ذرائع کا کہنا ہے کہ پیرکی شام افغان فورسز کی جانب سے طور خم سرحد پر ایک بار پھر فائرنگ کی گئی جس کے نتیجے میں پاک فوج کے مزید پانچ اہلکار زخمی ہوئے جنہیں فوری طور پر سی ایم ایچ(کمبائنڈ ملٹری ہوسپٹل) منتقل کردیا گیا ہے۔
قبل ازیں اتوار کی شام فائرنگ سے پاک فوج کے دو اہلکار اور نو شہری زخمی ہوگئے تھے جس کے بعد زخمی فوجی اہلکاروں کی تعداد سات ہوگئی ہے۔
دونوں واقعات میں پاک فوج کی جواب سے جوابی اور موثر فائرنگ کی گئی جس کے بعد فائرنگ کا سلسلہ کچھ دیر جاری رہا اور تھم گیا۔
آئی ایس پی آر نے طور خم سرحد سے پاکستانی حدودمیں 37میٹر اندر زیر تعمیر گیٹ کا نقشہ جاری کردیا ہے اور کہا ہے کہ یہ اہلکار اس گیٹ پر تعینات تھے جن پر افغان سرحدی حکام نے فائرنگ کی ، مقصد گیٹ کی تعمیر میں رکاوٹ ڈالنا ہے۔
اتوار کی شام ہونے والی فائرنگ پر دفتر خارجہ نے آج افغان ناظم الامور کو طلب کرکے احتجاج ریکارڈ کرایا تھا تاہم اس کے باوجود پیر کی شام دوبارہ فائرنگ کا واقعہ پیش آیا ہے۔
