تازہ ترین

چین پاکستان معاہدوں کے حوالے سے آئی ایم ایف کا اہم بیان

عالمی مالیاتی ادارے کا کہنا ہے کہ چین پاکستان...

جون تک پی آئی اے کی نجکاری کا عمل مکمل کرلیا جائے گا، وفاقی وزیر خزانہ

کراچی : وزیرخزانہ محمداورنگزیب کا کہنا ہے کہ پی...

حکومت کا ججز کے خط پر انکوائری کمیشن بنانے کا اعلان

اسلام آباد: وفاقی حکومت نے اسلام آباد ہائی کورٹ...

سندھ رینجرز کے اختیارات میں‌ توسیع، وفاق نے سمری مسترد کردی

اسلام آباد: سندھ میں رینجرز کے اختیارات سے متعلق سندھ حکومت اور وفاق میں‌ پھر اختلافات ہوگئے، سندھ حکومت کی ارسال کردہ سمری وفاق نے مسترد کردی۔

اطلاعات کے مطابق رینجرز کو اختیارات دینے کے معاملے پر سندھ حکومت اور وفاق میں ایک بار پھر اختلافات پیدا ہوگئے ہیں، سندھ حکومت کی جانب سے رینجرز کے قیام اور اختیارات میں نوے روز کی توسیع کے حوالے سے سمری وزارت داخلہ کو ارسال کردی گئی۔

سندھ حکومت کی جانب سے جاری کردہ سمری وفاق کو موصول ہوگئی ہے وفاقی وزارت داخلہ نے سمری پر تحفظات کا اظہار کرتے ہوئے اسے مسترد کردیا اور اس معاملے پر مشاورت شروع کردی۔

ذرائع کے مطابق وفاقی حکومت اس بات پر بضد ہے کہ رینجرز کو آرٹیکل 147 کے تحت ہی اختیارات دیئے جائیں گے لیکن صرف شہر کراچی میں نہیں بلکہ پورے سندھ میں اختیارات دیئے جائیں گے ۔

دوسری جانب قانونی ماہرین نے بھی سندھ حکومت کی جانب سے رینجرز کو اختیارات دینے کے معاملے پر سوالات کھڑے کردیے اور کہا ہے کہ سندھ حکومت کی سمری قانونی معیار پر پورا نہیں اتری ہے، آرٹیکل 147 کے تحت جو اختیارات دیے گئے وہ ٹھیک نہیں۔

قانونی ماہر معراج الہدی نے کہا کہ سندھ حکومت نے جو سمری ارسال کی تھی وہ اسی قابل تھی کہ اسے مسترد کردیا جائے۔

واضح رہے کہ وزیر اعلیٰ سندھ کی تبدیلی کے بعد یہ توقع کی جاری تھی کہ سندھ میں رینجرز کو مکمل اختیارات دیئے جائیں گے ، لیکن رینجرز کو دیئے جانے والے اختیارات صرف سندھ تک محدود ہیں ۔

پاکستان مسلم لیگ فنکشنل کی رہنما نصرت سحر عباسی کا کہنا تھا کہ بار بار آواز اٹھائی گئی ہے کہ کراچی میں رینجرز کے جاری آپریشن سے شہر میں امن قائم ہوا ہے جبکہ آپریشن کے باعث کراچی سے دہشت گرد اندرون سندھ منتقل ہوگئے ہیں جن کے خلاف کارروائی کے لئے رینجرز کو پورے سندھ میں مکمل اختیارات دیئے جائیں۔

پاکستان تحریک انصاف کے رہنما خرم شیر زمان اور عمران اسماعیل نے بھی سندھ حکومت سے مطالبہ کیا ہے کہ رینجرز کو پورے سندھ میں مکمل اختیارات دیئے جائیں، اس سے قبل تحریک انصاف کی جانب سے سندھ اسمبلی میں رینجرز اختیارات کے حوالے سے قراداد جمع کرائی جاچکی ہے۔خرم شیر زمان کا کہنا تھا کہ رینجرز کے اختیارات محدود نہیں ہونے دیں گے، رینجرز کو پورے سندھ میں اختیارات دیے جائیں،عوام رینجرز کی طرف دیکھ رہے ہیں۔

گزشتہ روز رینجرز اختیارات کے حوالے سے وفاقی وزیر داخلہ چوہدری نثار نے کہا تھا کہ کراچی آپریشن سندھ حکومت کی مشاورت اور درخواست پر شروع کیا گیا تھا جسے پورے پاکستان کی حمایت حاصل ہے اس لیے رینجرز کے معاملے کو سیاسی نہیں بننا چاہیے، وفاقی حکومت نے تہیہ کر رکھا ہے کہ رینجرز کو سیاسی فٹ بال بننے نہیں‌ دیں گے۔

دوسری جانب وزارت داخلہ کے ذرائع کا بھی کہنا ہے کہ سندھ حکومت کی سمری ناقص ہے اور آرٹیکل 147 کے معاملے پر پورا نہیں اترتی اس لیے سمری کو مسترد کیا گیا ہے۔

Comments

- Advertisement -