کابل :طالبان نے افغانستان کے اہم شمالی شہر قندوز پر قبضہ کرلیا اور شہر کے مرکزی چوک پر اپنا جھنڈا بھی لہرادیا ہے.
افغان حکومت اور فورسز ناکام ہوگئی، طالبان نے افغانستان کے شہر قندوز پر قبضہ کرلیا ہے، اطلاعات کے مطابق طالبان عسکریت پسندوں نے پیر کی صبح کارروائی کی، افغان ذرائع کے مطابق طالبان چار مختلف سمتوں سے شہر پر حملہ آور ہوئے اور افغان سیکیورٹی فورسز کو روندتے ہوئے شہر کے بڑے حصے پر قابض ہوگئے اور شہر کے مرکزی چوک پر اپنا جھنڈا بھی لہرا دیا۔
غیرملکی میڈیا پر چلنے والی ویڈیوز میں طالبان کو شہر میں گشت کرتے ہوئے دیکھا جاسکتا ہے، غیرملکی میڈیا رپورٹس کے مطابق طالبان کا کہنا ہے کہ وہ یہاں شریعت نافذ کرکے مدرسے ، اسکول اور سڑکیں اور پل بنانا چاہتے ہیں اس کے علاوہ ان کا کوئی اور مقصد نہیں ہے.
قندوز اسٹرٹیجک اہمیت کا حامل شہر ہے، جو افغانستان کی چار مختلف سمتوں کو آپس میں ملاتا ہے، طالبان کی جانب سے قندوز پر قبضے کی یہ تیسری کوشش ہے جو اب تک کی خبروں کے مطابق کامیاب قراردی جارہی ہے۔