شام کے تاریخی شہر پالمیرا کی تباہی نے تاریخ و ثقافت سے دلچسپی رکھنے والے ہر شخص کے دل کو دکھ سے بھر دیا۔ دنیا کی قدیم ثقافت کے کھنڈرات اور ایک تاریخ داعش کے حملوں میں اجڑ گئی۔
داعش نے قبضہ کرنے کے بعد نہ صرف خود بھی اس میں تباہی مچائی بلکہ داعش کو شکست دینے کے لیے جن اتحادی طیاروں نے وہاں بمباری کی ان کی وجہ سے بھی اس تاریخی خزانے کو بہت نقصان پہنچا۔
پالمیرا کو حال ہی میں داعش کے قبضے سے چھڑا لیا گیا۔ اے ایف پی کے ایک فوٹوگرافر نے وہاں کا دورہ کیا اور تصاویر لیں۔ وہ 2 سال پہلے بھی وہاں گئے تھے جب داعش کا وجود نہیں تھا۔ انہوں نے اس وقت کی اور اب کی تصاویر کا موازنہ کیا جس نے ہر حساس دل کو دکھا دیا۔
اس بارے میں شام کے ثقافتی ڈائریکٹر مومن عبدالکریم کا کہنا ہے کہ وہ تباہ شدہ حصوں کی بحالی پر کام کر رہے ہیں۔ اس سلسلے میں یونیسکو سے بھی مدد لی گئی ہے۔ انہوں نے دنیا بھر کے تاریخ دانوں کو دعوت دی کہ وہ پوری انسانیت کی اس تاریخ کی بحالی میں ان کی مدد کریں۔
