نوشکی: نوشکی میں امریکی ڈرون حملے میں ملامنصور کے ساتھ رینٹ اے کار کی گاڑی چلانے والے محمد اعظم کی ہلاکت کی ایف آئی آر ڈرائیور کے بھائی محمد قاسم کی مدعیت میں تھانہ لیویز مل نوشکی میں امریکی حکام کے خلاف درج کرلی گئی ہے۔
تفصیلات کے مطابق نوشکی کے مقام پر امریکی ڈرون حملے کی ایف آئی آر درج کرادی گئی ہے، رپورٹ حادثہ میں ہلاک ہونے والے ڈرائیور محمد اعظم کے بھائی محمد قاسم کی مدعیت میں درج کرائی گئی ہے،ایف آئی آرمیں 427،109، اور 302 کی دفعات لگائی گئی ہیں،جس کے ساتھ خصوصی 3،4،7 اور 7 اے ٹی اے کی دفعات بھی شامل کی گئی ہیں۔
یاد رہے 21 مئی کو نوشکی کے مقام پر ایک گاڑی پر امریکہ نے ڈرون حملہ کیا تھا جس کے نتیجے میں کار میں سوار دونوں افراد ہلاک ہوگئے تھے، ہلاک ہونے والوں میں امریکہ کو نہایت مطلوب افغان طالبان کے امیر ملا اختر منصوراور گاڑی چلانے والا ڈرائیور محمد اعظم شامل تھے۔
افغان انٹلی جنس نے طالبان رہنما ملا منصور کی ہلاکت کی تصدیق کردی
رپورٹ میں محمد قاسم نے موقف اپنایا کہ 21 مئی کو دن کے3 بجے اطلاع ملی کہ بھائی کی گاڑی دھماکے سے اُڑادی گئی ہے، گاڑی میں ولی محمد اور میرا بھائی سوار تھا، گاڑی پر ڈرون حملے کی ذمہ داری امریکی صدر نے خود قبول کی تھی اس لیے میں ایف آئی آر امریکی صدر بارک اوبامہ کا نام شامل کروانا چاہتا تھا، تاہم پولیس نے رپورٹ میں ’’امریکی حکام‘‘ کو نامزد کیا۔
امریکہ کے صدر بارک اوبامہ کا نوشکی ڈرون حملے میں ملا اختر منصور کی ہلاکت کی تصدیق کرتے ہوئے کیا کہنا تھا،یہ جاننے کے لیے درج ذیل لنک پر کلک کیجیے۔
امریکی صدر بارک اوبامہ نے ملا اختر منصور کی ڈرون حملے میں ہلاکت کی تصدیق کردی
اس موقع پر مقتول ڈرائیور کے بھائی محمد قاسم نے انصاف کی دہائی دیتے ہوئے کہا کہ ہم غریب لوگ ہیں،میرا بھائی بے گناہ تھا،گاڑی چلا کر روزی روٹی چلاتا تھا اور اس کا کسی جہادی تنظیم سے کوئی تعلق نہیں تھا، اُس کے چار چھوٹے چھوٹے بچے ہیں،اور وہ گھر کا واحد کفیل تھا،بھائی کے اہلِ خانہ کے لیےانصاف چاہتے ہیں۔