راولپنڈی: لائن آف کنٹرول پر بھارت کی جانب سے سیز فائر کی ایک بار پھر خلاف ورزی کی گئی ہے۔ بھارتی فوج نے اسکول وین کو نشانہ بنایا جس میں وین ڈرائیور شہید جبکہ 4 بچے زخمی ہوگئے۔
فوج کے شعبہ تعلقات عامہ آئی ایس پی آر کے مطابق بھارتی فوج نے نکیال کے علاقے میں اسکول وین کو نشانہ بنایا۔
اسسٹنٹ کمشنر سردار ذیشان نے فائرنگ سے وین ڈرائیور کے شہید ہونے کی تصدیق کرتے ہوئے کہا کہ اسکول وین پر فائرنگ کے نتیجے میں 4 بچے بھی زخمی ہوئے جنہیں اسپتال منتقل کردیا گیا ہے۔
آئی ایس پی آر کے مطابق پاک فوج کی جانب سے بھارت کو بھرپور جواب دیا گیا۔ پاک فوج نے مؤثر انداز میں بھارتی چوکیوں کو نشانہ بنایا جس کے بعد بھارتی توپیں خاموش ہوگئیں۔
:بھارتی ڈپٹی ہائی کمشنر کی طلبی
نکیال سیکٹر میں بلا اشتعال بھارتی فائرنگ پر بھارتی ڈپٹی ہائی کمشنر کو دفتر خارجہ طلب کرلیا گیا۔
ترجمان دفترخارجہ کے مطابق پاکستان نے اسکول بس فائرنگ کی شدید مذمت کرتے ہوئے بھارتی ڈپٹی ہائی کمشنر کو دفتر خارجہ طلب کرلیا۔
ترجمان کا کہنا تھا کہ بھارتی فورسز کا رویہ انسانی حقوق کی بدترین خلاف ورزی ہے۔ جنگ میں بھی بچوں کونشانہ نہیں بنایا جاتا۔ بھارت کی فائرنگ سے 1 شہری شہید اور 4 بچے زخمی ہوئے تھے۔
واضح رہے کہ کچھ عرصہ قبل بھی بھارتی فوج نے وادی نیلم میں مسافر بس کو نشانہ بنایا تھا جس میں 9 افراد شہید ہوگئے تھے۔ بھارت نے زخمیوں کو لے جانے والی ایمبولینس کو بھی نشانہ بنایا تھا۔
