نئی دہلی: بھارت میں جنسی زیادتی کے حالیہ واقعے میں ریپ کا شکارایک کم عمر لڑکی کو اسپتال میں علاج کے دوران دوبارہ زیادتی کا نشانہ بنائے جانے کا انکشاف ہوا ہے۔
فرانسیسی خبررساں ادارے کے مطابق 15 سالہ لڑکی نے پولیس کو بتایا کہ اتوارکواسپتال کے سیکیورٹی گارڈ نے اسے زیادتی کا نشانہ بنایا۔
مذکورہ لڑکی کو ریاست جھاڑکنڈ کے شہرجمشید پور کے ہسپتال میں علاج کی غرض سے داخل کیا گیا تھا۔
پولیس سپرنٹنڈنٹ جندن جا کا کہنا تھا ‘لڑکی کی شکایت کے بعد ہم نے مقدمہ درج کرکے نجی ہسپتال کے سیکیورٹی گارڈ کو گرفتارکرلیا جبکہ لڑکی کی میڈیکل رپورٹ کے آنے کا انتظار کیا جارہا ہے’۔
ان کا مزید کہنا تھا کہ ‘لڑکی کو مزید طبی سہولیات اوربحالی کے لیے شہرکے سب سے اچھے ہسپتال منتقل کردیا گیا’۔
خیال رہے کہ لڑکی نے اس سے قبل پولیس کو بتایا تھا کہ شہر کے مضافات میں اُسے اس کے ایک کم عمر پڑوسی نے جنسی زیادتی کا نشانہ بنایا تھا جس کے بعد علاج اور بحالی کے لیے لڑکی کو ایم جی ایم ہسپتال میں داخل کروایا گیا تھا۔
پولیس افسرکا کہنا تھا کہ ‘لڑکی کے ساتھ زیادتی کرنے والا پہلا فرد کیونکہ کم عمر تھا اس لیے اسے گرفتار کرکے بچوں کی جیل منتقل کردیا گیا ‘۔
