پٹھانکوٹ : بھارتی پنجاب کے شہر پٹھان کوٹ میں نامعلوم دہشتگردوں نے فضائیہ کےاڈے پر حملہ کردیا، جوابی کارروائی میں چار حملہ آور ہلاک ہوگئے جبکہ دہشتگردوں کی فائرنگ سے چار بھارتی فوجی بھی مارے گئے۔
بھارتی میڈیا کے مطابق بھارتی وقت کے مطابق صبح ساڑھے تین بجے ہونے والے حملے میں شدت پسند پولیس کی گاڑی استعمال کرتے ہوئے پٹھان کوٹ کے فضائی اڈے میں داخل ہوئے۔
خبر رساں ادارے کا کہنا ہے کہ بھارتی فضائیہ کے اڈے پر فوجی وردی میں ملبوس تقریباً سات مسلح افراد نے حملے کیا، حملے کے بعد سیکورٹی فورسز نے اڈے کو سیل کرکے آپریشن کا آغاز کردیا ہے۔
جوابی کارروائی میں چار حملہ آور مارے جاچکے ہیں جبکہ فائرنگ کا تبادلہ جاری ہے۔
بھارتی میڈیا کے مطابق دہشتگردوں کی فائرنگ سے بھارتی فضائیہ کا اہلکار بھی ہلاک ہوگیا ہے، حملہ اس جگہ کیا گیا جہاں فوجی طیارے موجود ہوتے ہیں تاہم حملے میں لڑاکا فوجی طیاروں کو نقصان نہیں پہنچا۔
بھارتی سیکورٹی فورسز کا کہنا ہے کہ تاحال حملہ آوروں کی شناخت واضح نہیں ہوسکی ہے، آپریشن میں حصہ لینےکیلئےفوجی ہیلی کاپٹروں اور کمانڈو یونٹ پہنچ گیا ہے۔
بھارتی فورسز نے حملے میں شدت پسند تنظیم جیش محمد ذمہ داری عائد کرتے ہوئے الزام لگایا کہ تنظیم کو پاکستان کی حمایت حاصل ہے۔
پٹھان کوٹ حملے کے بعد نئی دلی سمیت دیگرشہروں میں سیکورٹی ہائی الرٹ کردی گئی۔
