اسلام آباد : سابق چیف جسٹس افتخارچوہدری نے وزیراعظم نواز شریف کونااہل قرار دینے کے لیے ریفرنس اسپیکر قومی اسمبلی کو ارسال کرنے کا اعلان کیا ہے ، ان کا کہنا ہے کہ نواز شریف صادق اور امین نہیں رہے وہ بطور وزیر اعظم اپنا اخلاقی جواز کھو چکے ہیں انہیں نااہل قرار دیا جائے۔
Former CJ announces to file reference against… by arynews
وزیراعظم پاکستان میاں محمد نواز شریف کے خلاف ریفرنس دائر کرنے کا اعلان کرتے ہوئے سابق چیف جسٹس نے کہا کہ ’’میاں محمد نواز شریف نے یہ نہیں بتایا کہ بیرون ملک رقم منتقل کیسے کی گئی یا پھر بیرون ملک میں سرمایہ کاری کیسے کی گئی جبکہ شریف برادران نے دبئی میں موجود فیکٹری 2005 میں فروخت کردی تھی‘‘۔
انہوں نے کہا کہ ’’وزیر اعظم نوازشریف کا پاناما لیکس اور بیرونِ ملک اثاثوں کے متعلق بیان اعتراف جرم کی مترادف ہے اور عدالت اسے اعترافِ جرم اور قانونِ شہادت کے طور پر تسلیم کرسکتی ہے‘‘۔
خبر پڑھیں : جو لوگ الیکشن کمیشن گئے ہیں اب وہیں سے انصاف لیں، سردار ایاز صادق
افتخار محمد چوہدری کا مزید کہنا تھا کہ ’’اگر حکمران جماعت نے بیرونِ ملک سرمایہ کاری قانونی طریقے سے کی ہے تو اسے چھپانے کی کیا ضرورت ہے۔ انہوں نے اعلان کیا کہ وزیراعظم کی نااہلی سے متعلق ریفرنس اسپیکر ایاز صادق کو بھجوایا جارہا ہے۔
پڑھیں : پانامہ لیکس پرحکومت سےکوئی سمجھوتہ نہیں ہوگا، آصف زرداری
واضح رہے کہ پاناما لیکس میں حکمران خاندان کا نام سامنے آنے کے بعد حکومت اور اپوزیشن کے درمیان ٹی او آرز کی تشکیل کے لیے ایک کمیٹی قائم کی گئی تھی جو تاحال ڈیڈ لاک کا شکار ہے۔ اسپیکر قومی اسمبلی نے اس ڈیڈ لاک کو ختم کروانے کے لیے دونوں فریقین کے درمیان ایک اور نشست بٹھانے کا اعلان کیا ہے۔
مزید پڑھیں : حکمراں جماعت نے عمران خان کے خلاف ریفرنس دائر کردیا
اپوزیشن کی دو بڑی جماعتوں پیپلزپارٹی اور تحریک انصاف کی جانب سے وزیر اعظم پاکستان کی نااہلی سے متعلق پہلے ہی الیکشن کمیشن میں درخواستیں دائر کروادی گئی ہیں جو تاحال التوا کا شکار ہیں جبکہ حکومتی اراکین نے بھی تحریک انصاف کے لیے چیئرمین عمران خان کے خلاف اسپیکر قومی اسمبلی کے پاس نااہلی سے متعلق ریفرنس دائر کردیا ہے۔
