کراچی: پاکستان کی خواتین فٹ بال کی ٹیم میں شامل اسٹرائیکر شاہ لیلیٰ احمد زئی بلوچ گزشتہ شب ایک کار حادثے میں انتقال کر گئیں۔
خاندانی ذرائع نے حادثے کی تصدیق کرتے ہوئے بتایا کہ شاہ لیلیٰ کار کی مسافر سیٹ پر سفر کر رہی تھیں جب حادثہ ہوا۔ دو دریا کراچی میں پیش آنے والا حادثہ کار کی تیز رفتاری کے باعث رونما ہوا جس میں کار الٹ گئی۔ لیلیٰ کو اسپتال پہنچایا گیا لیکن وہ جانبر نہ ہوسکیں۔
دوسری جانب پاکستان فٹ بال کے فیس بک صفحہ پر بھی اس کی تصدیق کی گئی۔ فٹ بال پاکستان ڈاٹ کام کی جانب سے شیئر کی جانے والی پوسٹ میں لکھا گیا، ’شاہ لیلیٰ نے پاکستان کی نمائندگی کی اور وہ بہت سی لڑکیوں کے لیے ایک رول ماڈل کی حیثیت رکھتی ہیں‘۔
انہوں نے شاہ لیلیٰ کے اہل خانہ سے اظہار تعزیت بھی کیا۔
شاہ لیلیٰ سابق سینیٹر روبینہ عرفان کی بیٹی ہیں اور وہ پاکستان کی قومی فٹبال ٹیم اور بلوچستان کی صوبائی ویمن فٹبال ٹیم کی اسٹرائیکر تھیں۔ ان کی عمر 20 سال تھی۔
لیلیٰ نے 7 برس کی عمر میں فٹبال کھیلنی شروع کی۔ انہیں فیفا کی جانب سے کم ترین کھلاڑی کا ایوارڈ بھی دیا گیا۔ لیلیٰ کی تدفین ان کے آبائی علاقے قلات میں کی جائے گی۔
