برازیلیا : ریاست امیزوناز میں ایک جیل میں ہونے والی خونی ہنگامہ آرائی میں پچاس سے زائد قیدی ہلاک ہوچکے ہیں، خونی فسادات منشیات فروشوں کے حریف گروہوں کے درمیان ہوئے جس میں اب 50 افراد کی ہلاکت کی اطلاعات ہیں خدشہ ہے کہ اس فساد کے دوران ہلاکتوں کی تعداد میں اضافہ ہو سکتا ہے۔
برازیل میں حکام کا کہنا ہے کہ ہنگامہ آرائی کا آغاز اتوار کو ہوا تھا، لڑائی پیر کو اس وقت ختم ہوئی جب قیدیوں نے ہتھیار ڈالے اور یرغمال بنائے گئے 12 محافظوں کو رہا کر دیا گیا۔
برطانوی نشریاتی ادارے بی بی سی کے مطابق جیل کے ایک اہلکار کا کہنا ہے کہ ہنگامہ آرائی کا آغاز دو متحارب گروپوں کے مابین لڑائی کے بعد ہوا۔ ہنگامہ آرائی کے دوران متعدد قیدی فرار بھی ہوئے۔
مزید پڑھیں: برازیل:جیل میں 2 گروپوں میں تصادم،25 قیدی ہلاک
جب اتوار کے روز ہنگامہ آرائی شروع ہوئی تو چھ لاشوں کو جیل کی دیوار سے باہر پھینکا گیا۔ جیل میں 454 قیدیوں کی گنجائش ہے لیکن اس وقت اس میں تقریباً 600 قیدی رکھے گئے ہیں۔
علاوہ ازیں اکتوبر میں بوا وِستا کی جیل میں ہونے والی ہنگامہ آرائی میں 25 قیدی ہلاک ہو گئے تھے جبکہ سات نوجوان ایک دوسری ریاست کی جیل میں ہونے والی ہنگامہ آرائی میں ہلاک ہوئے تھے۔
